ევროპის საბჭოს საპარლამენტო ასამბლეის პრეზიდენტი მევლუთ ჩავუზოღლუ მხურვალედ მიესალმა ადამიანის უფლებათა ევროპული კონვენციის მე-14 ოქმის რატიფიცირებას რუსეთის მიერ. “ეს რატიფიცირება უფრო მეტად განამტკიცებს თითოეული ინდივიდის ძირითად უფლებათა დაცულობას ევროპის საბჭოს 47 წევრი სახელმწიფოს იურისდიქციის ფარგლებში”, განაცხადა მან.

“რუსეთის ხელისუფლება გვიგზავნის უტყუარ შეტყობინებას. უპირველეს ყოვლისა, რატიფიცირება გამოხატავს მის ნებას, მოგვევლინოს მნიშვნელოვან პოლიტიკურ მოთამაშედ ორგანიზაციაში. ის გვიჩვენებს, რომ რუსეთი მყარად ერთგულებს ევროპის საბჭოს ფასეულობებსა და დაცვის მექანიზმებს და ასევე, ის ხელს უწყობს რუსეთის სასამართლოებს, რათა მათ თავიანთ განჩინებებში გაითვალისწინონ ადამიანის უფლებათა ევროპული კონვენცია და სტრასბურგის სასამართლოს პრეცედენტული სამართალი”, განაცხადა პრეზიდენტმა.

“რუსეთის მიერ ოქმის რატიფიცირება შესაძლებელს გახდის ასევე მე-14 ოქმის ძალაში შესვლას, რაც, თავის მხრივ, სტრასბურგის მხრიდან უზრუნველყოფს სამართლებრივ საფუძველს ევროკავშირის მისაერთებლად ევროპულ კონვენციასთან. და ბოლოს, მოკლე ხანში სასამართლოს შეეძლება, უფრო სწრაფად განიხილოს დაგროვილი საჩივრები, რაც წარმოადგენს კიდეც ოქმის მთავარ მიზანს”, დასძინა მან.

“როგორც საპარლამენტო ასამბლეის ახალი პრეზიდენტი, არ დავზოგავ ძალისხმევას, რათა დავაჩქარო ევროპის საბჭოსა და რუსეთს შორის ეფექტიანი თანამშრომლობა ნებისმიერ სხვა სფეროში, სადაც ჩვენ ორგანიზაციას შეუძლია პოლიტიკური მხარდაჭერისა და ტექნიკური დახმარების გაწევა”, დაასკვნა მან.

ევროპის საბჭოს კომუნიკაციის განყოფილება
ტელ: 33 (0)3 88 41 25 60
ფაქსი: 33 (0)3 88 41 39 11
pressunit@coe.int
www.coe.int

დამატებითი ინფორმაციისათვის იხილეთ:
www.coe.int / www.coe.ge